Бидэнтэй нэгдэх

Шударга мэдээ

БНХАУ-ын аялал жуулчлалын компанийн удирдлагууд Улаанбаатар хоттой танилцлаа

Огноо:

1 жил 3 сар.өмнө

,

Нийслэлийн Засаг даргын Тамгын газар, Нийслэлийн Аялал жуулчлалын газар, Монголын Аялал жуулчлалын холбоо, “Зуут травел” компани хамтран тавдугаар сарын 8-10-ны өдрүүдэд “Улаанбаатар хотыг олон улсад сурталчлах арга хэмжээ” хөтөлбөрийг зохион байгуулж, БНХАУ-ын аялал жуулчлалын 100 компанийг урьж, дотоодын аялал жуулчлалын онцлогийг танилцууллаа.

Гадаадын жуулчдыг нэмэгдүүлэх зорилготой энэхүү хөтөлбөрийн хүрээнд Улаанбаатар хот болон хот орчмын аялал жуулчлалын бүтээгдэхүүн үйлчилгээтэй танилцахаар БНХАУ-ын  Бээжин, Шанхай, Сычуань, Хэбэй, Юньнан, Тяньжин, Гуанжоу зэрэг 18 мужийн 100 гаруй шилдэг аялал жуулчлалын байгууллагын төлөөлөгчид ирсэн юм.

Хөтөлбөрийн хүрээнд хоёр улсын аялал жуулчлалын хамтын ажиллагааг өргөжүүлэх “Аялал жуулчлалын бизнес эрхлэгчдийн (B2B) уулзалт”-ыг зохион байгуулав. Уулзалтад НИТХ-ын дарга А.Баяр, Нийслэлийн Засаг дарга бөгөөд Улаанбаатар хотын Захирагчийн дэд бүтэц, эрчим хүчний асуудал хариуцсан зөвлөх  Г.Батсайхан, Нийслэлийн Аялал жуулчлалын газрын Маркетинг сурталчилгаа хариуцсан мэргэжилтэн Н.Алтанзаяа, Монголын аялал жуулчлалын холбооны гүйцэтгэх захирал Д.Отгонбаяр зэрэг албаныхан оролцлоо. Уулзалтыг нээж НИТХ-ын дарга А.Баяр “2024 онд Монгол Улс, Бүгд Найрамдах Хятад Ард Улсын дипломат харилцаа тогтоосны 75 жилийн ой болж өнгөрсөн бөгөөд энэ хугацаанд бид худалдаа, эдийн засаг, аялал жуулчлал, соёл, хүмүүнлэгийн чиглэлийн хамтын ажиллагаагаа өргөжүүлэн бэхжүүлж улмаар иж бүрэн стратегийн түншлэлийн түвшинд хүрч идэвхтэй хамтран ажиллаж байгаа билээ.  Хоёр орны ард түмний аялал жуулчлал, соёлын хэлхээ холбоог бататгаж, иргэд хоорондын харилцан ойлголцлыг зузаатгах нь чухал ач холбогдолтой бөгөөд Улаанбаатар хотын аялал жуулчлалын бүтээгдэхүүн үйлчилгээг сурталчлах, жуулчдын тоог нэмэгдүүлэх ажлын хүрээнд энэхүү арга хэмжээг зохион байгуулж байна. Өмнөх онуудад мөн хоёр орны аялал жуулчлалыг хөгжүүлэх чиглэлээр нийслэлийн зүгээс Монгол Улс, БНХАУ, ОХУ-ын Цайны замын авто машинтай аялал, Соёлын өвийг сэргээх чиглэлээр Цайны замын хөшөөг Улаанбаатар хотод бүтээн байгуулсан. Түүнчлэн тусгай сонирхлын аялал жуулчлалыг хөгжүүлэх чиглэлээр БНХАУ болон олон улсаас ирж оролцдог “Талын салхи” олон улсын мото фестивалийг 10 дахь жилдээ зохион байгуулах гэж байна. Энэхүү арга хэмжээгээр дамжуулан Улаанбаатар хотын соёл, аялал жуулчлалын нөөц хэрхэн өсөн нэмэгдэж байгааг онцлон харж, өөрсдийн ажлын шугамаар сурталчлан таниулна гэдэгт итгэлтэй байна” хэмээн хэллээ.

Уулзалтад Монголын талаас Хятад улс руу аялал жуулчлалын үйлчилгээ үзүүлдэг дотоодын 15 компани болон БНХАУ-ын аялал жуулчлалын 100 компанийн төлөөлөл оролцож харилцан туршлага солилцов. Хятадын аялал жуулчлалын компаниуд Монголын аялал жуулчлалын компаниудтай хэрхэн хамтарч ажиллах боломжтой, групп аялал, гэр бүлийн аялал, ганцаарчилсан аялал, урт хугацааны аяллын ямар хөтөлбөрүүд байгаа талаар сонирхож мэдээлэл солилцов. Түүнчлэн БНХАУ-ын аялал жуулчлалын компаниудын төлөөллүүд Сүхбаатарын талбай, “Чингис хааны музей”, Гандантэгчэнлин хийдээр аялж, хот орчмын буюу Тэрэлж дэх хэд хэдэн аялал жуулчлалын цогцолбор газруудын үйл ажиллагаатай танилцаж, монголын өв соёлыг илтгэсэн жуулчдад зориулсан тоглолт зэргийг үзэж сонирхлоо. Хөтөлбөрийн хүрээнд БНХАУ-ын аялал жуулчлалын компаниуд Улаанбаатарын аялал жуулчлалын бүтээгдэхүүн, үйлчилгээтэй танилцаж, Монгол руу чиглэсэн Хятадын жуулчдын тоог нэмэгдүүлэхэд анхаарч, хамтарч ажиллахад бэлэн гэдгээ илэрхийллээ. 

Эх сурвалж: НИТХ-ХМОНХА

Уншсан:1688
Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Шударга мэдээ

Шатахууны нөөцийг нэмэгдүүлэх, доголдлыг арилгахад анхаарч байна

Огноо:

2 өдрийн өмнө

,

Аж үйлдвэр, эрдэс баялгийн яамнаас шатахууны нөхцөл байдалтай холбогдуулан цаг үеийн асуудлаар ээлжит хэвлэлийн бага хурал хийлээ.

Тус яамны Төрийн нарийн бичгийн дарга Б.Дашпүрэв мэдээллийн эхэнд Ерөнхий сайдын захирамжаар байгуулагдсан шатахууны хангамж, нийлүүлэлтийг тогтворжуулах шуурхай штаб нь богино хугацаанд нөөцийг нэмэгдүүлэх, доголдлыг арилгахад анхаарч ажиллаж байгааг онцоллоо.

Тэрбээр "Өнгөрсөн хоногт Улаанбаатар хотод 155 ШТС, орон нутгийн 80 ШТС-д түгээлт хийсэн байна. Улаанбаатар хотод автомашины тэгш, сондгой дугаараар хэрэглэгчдэд нэг удаа 50,000 төгрөг хүртэл автобензин олгох зохицуулалт хэрэгжиж байгаа бөгөөд зөөврийн саванд олгохгүй. Энэ нь аюулгүй байдлыг хангах үүднээс болон дамлан худалдахаас сэргийлж буй юм. Орон нутгийн иргэд намрын ургац хураалт, хадлантай холбоотой ШТС-уудаар зөөврийн саваар автобензин авч болно. Улаанбаатар хотод автомашины тэгш, сондгой дугаараар хэрэглэгчдэд нэг удаа 50,000 төгрөг хүртэл автобензин олгох зохицуулалт энэ сарын 15-ны өдрийг хүртэл үргэлжлэх бөгөөд энэ үед нөөцийг хэвийн болгох, хэвийн горимоор ажлаа үргэлжүүлнэ гэж найдаж байна. Шатахууны нөөцийг нэмэгдүүлэх, нийлүүлэлтийг тогтворжуулах хүрээнд бусад эх үүсвэрийг нэмэгдүүлэх чиглэлд анхаарч байна. Замын-Үүд боомтоор 2000 тонн дизель түлш орж ирсэн бөгөөд шилжүүлэн ачих ажиллагаа хийгдэж байна" гэлээ гэж Аж үйлдвэр, эрдэс баялгийн яамнаас мэдээллээ. 

Дэлгэрэнгүй унших

Шударга мэдээ

Шатахууны импортын гаалийн албан татварыг 2027 оны хоёрдугаар сарын 1 хүртэл тэглэнэ

Огноо:

3 өдрийн өмнө

,

Засгийн газрын 2026 оны наймдугаар сарын 5-ны өдрийн ээлжит хуралдаанд “Автобензин, дизель түлшний онцгой албан татварын тухай” асуудлыг Аж үйлдвэр, эрдэс баялгийн сайд Г.Дамдинням танилцууллаа.

Монгол Улс 2026 оны наймдугаар сард ОХУ-ын “Роснефть”, “Нефтьхимисервис”, “Газпром нефть” болон бусад компани, БНХАУ, БНСУ-аас нийт 86,460 тонн АИ-92 автобензин, 1,280 тонн АИ-95 автобензин, 178,650 тонн дизель түлш, 7,000 тонн онгоцны түлш авахаар захиалгаа баталгаажуулж, гэрээ байгуулжээ.

Ойрх Дорнод дахь геополитикийн нөхцөл байдал, Орос, Украины дайнаас шалтгаалсан газрын тосны үнийн өсөлт дэлхийн зах зээлд буураагүй байна. Үүний улмаас наймдугаар сард хил үнэ тонн тутамд дахин өсөж, ОХУ болон бусад эх үүсвэрээс худалдан авах шатахууны үнэ 1,200-2,000 ам.долларт хүрчээ.

Иймд дотоодын зах зээл дэх үнийн өсөлтийг сааруулахын тулд гаалийн болон онцгой албан татварыг тэглэх шаардлага үүссэнийг салбарын сайд танилцуулсан байна.

Ерөнхий сайд Н.Учрал ОХУ шатахууны бүх төрөлд экспортын хориг тавьсан ч Монгол Улс уг хоригт хамрагдахгүй гэдгийг онцоллоо. Мөн БНХАУ, БНСУ-аас шаардлагатай түлш, шатахуун нийлүүлэхээр тохиролцсон байна.

Тэрбээр шатахууны нөөц, түгээлтийн мэдээллийг иргэдэд ил тод хүргэж, 33 жилийн дараа анх удаа хэрэгжиж буй шатахуун нөөцлөх 22 сав, агуулахын барилгын ажлын явцыг Засгийн газар болон олон нийтэд тогтмол мэдээлэхийг үүрэг болгожээ.

“Газрын тосны бүтээгдэхүүний хомсдолоос сэргийлэх талаар авах зарим арга хэмжээний тухай” Засгийн газрын тогтоолоор бүх төрлийн шатахууны импортын гаалийн албан татварыг 2027 оны хоёрдугаар сарын 1 хүртэл тэг хувиар тогтоолоо.

Мөн газрын тосны бүтээгдэхүүн, шатахууныг хилээр шуурхай нэвтрүүлэх, тээвэрлэх, буулгах, гадаад вагонцистерний ашиглалтын төлбөр, хураамжийг хөнгөвчлөх, шаардлага хангасан зөвшөөрлийн хүсэлтийг түргэн шийдвэрлэх, шатахууны нийлүүлэлтийн тогтвортой байдлыг хангахыг холбогдох сайд нарт үүрэг болголоо.

Дэлгэрэнгүй унших

Шударга мэдээ

Нөөцийн махны хяналтын тогтолцоог шинэчилнэ

Огноо:

3 өдрийн өмнө

,

Монгол Улсын Засгийн газрын 2026 оны наймдугаар сарын 5-ны өдрийн ээлжит хуралдаанаар “Стратегийн нөөцийн зарим бараа болон хүнсний ногооны нийлүүлэлтийг тогтворжуулах, хүртээмжийг сайжруулах чиглэлээр авах арга хэмжээний тухай” тогтоолыг баталлаа.

Тогтоолын хэрэгжилтэд хяналт тавихыг холбогдох сайд нарт үүрэг болгожээ.

Нөөцийн мах бэлтгэхээс эхлээд худалдан борлуулах хүртэлх бүх шатны хяналт сул байсныг Засгийн газрын хуралдаанаар онцолсон байна. Тухайлбал, 2025 онд 5016 тонн нөөцийн мах бэлтгүүлэхээр аж ахуйн нэгжүүдтэй гэрээ байгуулж, зээлийн хүүгийн хөнгөлөлт үзүүлжээ.

Гэвч хаврын улиралд зах зээлд нийлүүлэхээр төлөвлөсөн 720 тонн махыг нийлүүлээгүй байна. Мөн 3203 тонн махыг цахим төлбөрийн баримттай борлуулсан бол үлдсэн махыг төлбөрийн баримтгүй болон хэт өндөр дүнгээр борлуулсан зөрчил илэрчээ.

Иймд нөөцийн махны бүртгэл, хяналтын тогтолцоог цахимжуулах Засгийн газрын тогтоол баталсан байна.

Бүртгэл, хяналтын нэгдсэн системийг Сангийн яам наймдугаар сард багтаан бэлэн болгоно. Монголбанк болон арилжааны банкуудтай хамтран стратегийн бүтээгдэхүүний нөөц бүрдүүлэх, хадгалах, түгээх, борлуулах бүх шатанд цахим төлбөрийн баримт үйлдэж, бүртгэлийг ил тод болгох юм.

2026 оны намар бэлтгэж, 2027 оны хавар худалдаанд гаргах нөөцийн махны бүрдүүлэлтэд Нийслэлийн Засаг дарга Б.Пүрэвдагваг онцгойлон анхаарч ажиллахыг Ерөнхий сайд үүрэг болгожээ.

Нөөцийн махыг цахим системд бүртгэснээр мах бэлтгэлийн явц, нөөцийн үлдэгдэл ил тод болно. Мөн хөнгөлөлттэй зээлийг зориулалтын бусаар ашиглах явдлыг таслан зогсоох, хүртээмжийг нэмэгдүүлэх, өрсөлдөөнийг бий болгох боломжтой гэж үзжээ.

Иргэд агуулах, үйлдвэрээс махаа шууд худалдан авах, малчид системээр дамжуулан бүтээгдэхүүнээ эцсийн хэрэглэгчид борлуулах боломж бүрдэх юм.

Түүнчлэн түлш, улаанбуудай, хүнсний ногооны нөөц бүрдүүлэх зоорь, агуулах барих аж ахуйн нэгжүүдэд хөнгөлөлттэй зээл олгох, цахилгааны хөнгөлөлт үзүүлэхийг салбарын сайд нарт үүрэг болголоо.

 
 
Дэлгэрэнгүй унших
сурталчилгаа

Санал болгох