Улстөр нийгэм
Польш-Монголын парламентын бүлгийн дарга Станислав Горчыца тэргүүтэй төлөөлөгчид Монгол Улсад айлчилж байна
Монгол Улсын Их Хурал дахь Монгол-Польшийн парламентын бүлгийн урилгаар Бүгд Найрамдах Польш Улсын Сеймийн гишүүн, парламент дахь Польш-Монголын парламентын бүлгийн дарга, Төлөөлөгчдийн тэргүүн Станислав Горчыца тэргүүтэй төлөөлөгчид 2025 оны 09 дүгээр сарын 29-нөөс 10 дугаар сарын 4-ний өдрүүдэд Монгол Улсад албан ёсоор айлчилж байна.
Зочид төлөөлөгчдийг Монгол Улсын Их Хурлын гишүүн, Улсын Их Хурлын Эдийн засгийн байнгын хорооны дарга Р.Сэддорж 2025 оны есдүгээр сарын 29-ний өдөр хүлээн авч уулзлаа. Тэрбээр хоёр улсын хооронд дипломат харилцаа тогтоосны 75 жилийн ойн мэндийг хүргэж, тэртээх он жилүүдэд Монгол Улс Нэгдсэн Үндэстний Байгууллагад гишүүнээр элсэхэд Польш Улс хамгийн түрүүнд хүлээн зөвшөөрсөн улс орны нэг байсан явдалд байнга талархаж явах учиртайг онцлов. Монгол Улсын төрийн тэргүүн тус улсад энэ жил айлчлахдаа Монгол-Польш Улс хоорондын иж бүрэн түншлэлийн харилцааг тогтоож, 2030 он хүртэлх таван жилийн төлөвлөгөөг батлан шат ахиулсан. Монгол Улсын Их Хурал таван нам, эвслийн төлөөллөөс бүрдсэн, анхны 126 гишүүн сонгогдон ажиллаж байгаа. Найман байнгын хороотой. Эдгээрээс Эдийн засгийн байнгын хороо 32 гишүүнтэй, хамгийн том нь гэв. Түүнчлэн Монголын парламент гадаадын хөрөнгө оруулалтыг дэмжих таатай орчин бүрдүүлэхийг чухалчилж, хоёр улсын иргэд хоорондын харилцааг бэхжүүлэх, улс хооронд шууд нислэгтэй болгох, зэс боловсруулах үйлдвэр байгуулах, нүүрсний далд уурхай, Шинэ Зуунмод, Хархорин хотыг бүтээн босгох, аймаг, муж хоорондын харилцааг дэмжих чиглэлд хамтрах байр суурьтай байгаагаа илэрхийллээ. Өмнөговь аймгаас сонгогдсон гишүүний хувьд Польш эрдэмтэд Монголын говиос үлэг гүрвэл, археологийн олдворын судалгааг хийж, дэлхийд таниулсан тухай кино хийж буйг дурдав.
Польш-Монголын парламентын бүлгийн дарга С.Горчыца Монголын талаас урьсан явдалд талархаад, айлчлалын бүрэлдэхүүнээ танилцууллаа. Түүний хувьд хоёр улсын түншлэлд ижил төстэй үнэт зүйлс ихээхэн нөлөөтэй хэмээв. Мөн Польш Улсад Монголын парламентын бүлгийн дарга тэргүүтэй төлөөлөгчид саяхан айлчилсан нь харилцааг ахиулж, уул уурхай, хил хамгаалах чиглэлд шинэ боломжийг эрэлхийлж эхэлсэн. Албан айлчлалынхаа хүрээнд уул уурхайн салбарын сайдтай уулзахаар товлосон. Олон Улсын тавцанд хоёр улсын харилцан дэмжлэг, байр суурь чухал байна гэлээ. Түүнчлэн хоёр улсын гадаад худалдааны эргэлт жилд 90 орчим сая ам.доллар байдгийг хоёр дахин өсгөх, хөдөө аж ахуй, жимс жимсгэнэ, хүнсний ногоо зэрэг чиглэлд бизнесийн шинэ гарц бий болгох хэрэгтэйг онцоллоо. Цар тахлын улмаас хойшилсон зарим төсөл, хөтөлбөрийг үргэлжлүүлэхийн тулд хоёр улсын Засгийн газар хооронд байгуулсан нөхцөлт зээлийн гэрээг дахин сунгахад анхаарал хандуулж өгөхийг тус Байнгын хорооноос хүсэв. Энэхүү гэрээг сунгаснаар 50 сая еврогийн зээлийн хөрөнгөөр таван аймагт цэвэрлэх байгууламж шинэчлэх, Орхон аймагт хатуу хог хаягдлыг боловсруулах үйлдвэр байгуулах, явуулын түргэн тусламжийн үйлчилгээ бүхий тэрэг, гал унтраах тэрэгний асуудлыг шийдвэрлэнэ гэсэн юм.
Монгол Улсын Их Хурлын гишүүн, Монгол-Польшийн парламентын бүлгийн дарга Ж.Золжаргал, хамтын ажиллагааны тэргүүлэх чиглэлд хоёр улсын хууль тогтоох дээд байгууллагуудын харилцааг тусгаж, таван жилийн төлөвлөгөөнд эдийн засгийг дэмжих бодлогыг хэрэгжүүлэхээр төлөвлөсөн учраас хамгийн түрүүнд Эдийн засгийн байнгын хорооныхонтой уулзалт товлосон хэмээсэн бол Монгол Улсын Их Хурлын гишүүн П.Ганзориг, хоёр улс иж бүрэн түншлэлийн хүрээнд байгуулсан төлөвлөгөөгөө хөгжлийнхөө төлөвлөгөөтэй уялдуулах нь илүү үр дүнтэйг онцоллоо.
Польш-Монголын парламентын бүлгийн дэд дарга Марэк Жонса, өнгөрсөн найман жилд тус бүлгийг ахалж ажилласан талаар танилцуулаад, хууль тогтоох байгууллагуудын хамтын ажиллагаанд хоёр улсын үе үеийн парламентын бүлгүүдийн олон удаагийн уулзалт, урт хугацааны харилцааны түүх байгааг сануулав. Польш Улсын Сеймийн гишүүн, Польш-Монголын парламентын бүлгийн гишүүн Эва Колоджией, манай хоёр улс уул уурхай, олборлолтын салбарт ижил төстэй зүйл их учраас энэ чиглэлд түлхүү хөгжих боломж бий гэсэн юм.
Ийнхүү талууд хоёр улсын парламент хоорондын харилцаанд сэтгэл өндөр байгаагаа харилцан илэрхийлж, цаашдын хамтын ажиллагааны талаар санал солилцсоноор уулзалт өндөрлөлөө.
Уулзалтад Монгол Улсаас Бүгд Найрамдах Польш Улсад суух Онц бөгөөд Бүрэн эрхт Элчин сайд Н.Оюундарь, Польш-Монголын парламентын бүлгийн дэд дарга Марэк Жонса, Польш Улсын Сеймийн Тамгын газар болон УИХ-ын Тамгын газар, Элчин сайдын яамдын төлөөлөл байлцав.
Албан айлчлал үргэлжилж байна гэж Монгол Улсын Их Хурлын Хэвлэл мэдээллийн газраас мэдээллээ.
Улстөр нийгэм
Нэгдүгээр ангийн элсэлтийг E-Mongolia-аар зохион байгуулна
2026 оны 8 дугаар сарын 17-28-ны өдрүүдэд Улаанбаатар хотод НҮБ-ын Цөлжилттэй тэмцэх тухай конвенцын Талуудын 17 дугаар бага хурал (COP17) болно.
Энэ хурал нь дэлхийн 197 улсын Засгийн газрын гишүүд, эрдэмтэн судлаач, хувийн хэвшил, иргэний нийгмийн байгууллага нэгдэж цөлжилт, газрын доройтол, ган гачигтай тэмцэх хамгийн том Олон Улсын арга хэмжээ юм.
Хурал болохтой холбоотой нийслэлийн замын хөдөлгөөн, аюулгүй байдал, төрийн үйлчилгээний хэвийн ажиллагааг хангах зорилгоор боловсролын байгууллагуудын үйл ажиллагаанд дараах зохицуулалт хэрэгжүүлэхээр болжээ .
Цэцэрлэгийн бүртгэл
- 2026 оны 8 дугаар сарын 10–23-ны өдрүүдэд E-Mongolia системээр бүртгэнэ.
Нэгдүгээр ангийн элсэлт
- 2026 оны 8 дугаар сарын 17–28-ны өдрүүдэд E-Mongolia системээр бүртгэнэ.
- Энэ хугацаанд хүүхэд бүртгэх дэмжлэгийн баг сургуулиуд дээр ажиллахгүй.
Их, дээд сургуулийн хичээл
- 2026 оны 9 дүгээр сарын 1-нээс цахимаар эхэлнэ.
- 2026 оны 9 дүгээр сарын 14-нөөс танхимаар үргэлжилнэ.
Оюутны дотуур байр
- 2026 оны 9 дүгээр сарын 13-наас оюутнуудыг дотуур байранд оруулж эхэлнэ.
Сургууль, цэцэрлэгийн үйл ажиллагааны зохицуулалт
- 2026 оны 8 дугаар сарын 17–28-ны өдрүүдэд нийслэлийн бүх сургууль, цэцэрлэгт ажлын байранд элсэлт, бүртгэл болон бусад аливаа арга хэмжээ зохион байгуулахгүй болно.
Улстөр нийгэм
Францад иргэд рүү зөвшөөрөлгүй сурталчилгааны дуудлага хийхийг хориглов
Франц улс иргэдийн урьдчилсан зөвшөөрөлгүйгээр бараа, үйлчилгээ сурталчлах зорилгоор утсаар холбогдохыг хориглосон шинэ хуулийг наймдугаар сарын 11-нээс хэрэгжүүлнэ. Уг зохицуулалт нь иргэдийг залхаасан борлуулалтын дуудлага болон залилангийн шинжтэй арилжааны үйл ажиллагаанаас хамгаалахад чиглэжээ.
Өмнө нь сурталчилгааны дуудлага хүлээн авахгүй байхыг хүссэн иргэд төрийн тусгай бүртгэлд утасны дугаараа оруулах шаардлагатай байсан ч зарим дуудлагын төв уг жагсаалтыг үл тоодог байжээ. Шинэ хуулиар харин аж ахуйн нэгжүүд хэрэглэгчээс урьдчилан зөвшөөрөл аваагүй тохиолдолд сурталчилгааны зорилгоор утсаар холбогдох эрхгүй болно. Иргэн өгсөн зөвшөөрлөө хүссэн үедээ цуцлах боломжтой.
Францын эрх баригчдын тооцоолсноор тус улсын иргэдийн дөрөвний гурав орчим нь долоо хоног бүр дор хаяж нэг удаа хүсээгүй сурталчилгааны дуудлага хүлээн авдаг бөгөөд олон хүн үүнээс ч олон дуудлагад өртдөг байна. Хэрэглэгчийн эрхийг хамгаалах 11 байгууллага 2024 онд хамтран шаардлага гаргаж, суурин болон гар утас руу ирдэг тасралтгүй сурталчилгааны дуудлагыг хориглохыг уриалж байжээ.
Хуулийг зөрчиж дуудлага хийсэн хувь хүнийг нэг дуудлага тутамд 75 мянга хүртэлх евро, аж ахуйн нэгжийг 375 мянга хүртэлх еврогоор торгох боломжтой. Харин хэрэглэгч өөрөө зөвшөөрсөн, эсвэл тухайн компанитай өмнө нь гэрээний харилцаатай бөгөөд шинэ үйлчилгээ санал болгож буй тохиолдолд хориг үйлчлэхгүй. Иргэд зөвшөөрөлгүй дуудлагын талаар төрийн цахим хуудсаар мэдээлэх боломжтой.
Шинэ хууль Францын зах зээлд үйлчилдэг гадаадын дуудлагын төвүүдэд нөлөөлөхөөр байна. Тухайлбал, Мароккогийн дуудлагын төвүүдийн орлогын 80 гаруй хувь Францын зах зээлээс бүрддэг бөгөөд тус улсын 40–50 мянган ажлын байр эрсдэлд орж болзошгүйг Мароккогийн хөдөлмөр эрхлэлтийн сайд мэдэгджээ.
Улстөр нийгэм
Засгийн газар энэ оныг дуустал санхүүгийн хэмнэлтийн горимд шилжинэ
Засгийн газрын 2026 оны наймдугаар сарын 5-ны өдрийн хуралдаанаар “Төсвийн санхүүжилтэд эрэмбэ тогтоож, төсвийн хэмнэлт, мөнгөн хөрөнгийн зохицуулалт хийх зарим арга хэмжээний тухай” тогтоолыг баталлаа.
Тогтоолоор төрийн албан хаагчдын цалин, тэтгэвэрт гарах нэг удаагийн тэтгэмж, орон нутгийн нэмэгдэл тэтгэмж, тэтгэвэр, хүүхдийн мөнгө, бүх төрлийн халамж, сургууль, цэцэрлэг болон сургалтын байгууллагын урсгал засвар, санхүүжилт, төрийн байгууллагын интернетийн төлбөр, байр ашиглалтын зардал, хууль, хүчний байгууллагын тээвэр, шатахууны зардал, дотоодын томилолт, хоол хүнс, нормын хувцасны зардал, COP17 олон улсын бага хурлын зардал, Засгийн газрын өр, орон нутгийн нөөц хөрөнгийн санхүүжилтийг хэвийн үргэлжлүүлэхээр шийдвэрлэжээ.
Харин дараах зардлыг хязгаарлахаар болсон байна. Үүнд:
- Олон улсын болон Засгийн газрын шийдвэртэйгээс бусад хурал, зөвлөгөөн, ой, тэмдэглэлт өдөр, найр наадам, соёлын арга хэмжээ;
- Урьдчилан төлөвлөсөн төрийн өндөр албан тушаалтны томилолтоос бусад гадаад томилолт, гадаадын зочин хүлээн авах зардал;
- Зайлшгүй шаардлагагүй тоног төхөөрөмж, тавилга, автомашин худалдан авах;
- Батлан хамгаалах, хууль зүйн салбараас бусад сургалт, дадлага;
- Хуулиар заавал мэдээлэхээс бусад кино, контент, хэвлэлийн зардал;
- Заавал олгохоос бусад тэтгэмж, урамшуулал.
Санхүүгийн хэмнэлтийн горимыг 2026 оны арванхоёрдугаар сарын 31 хүртэл мөрдөнө. Харин эрүүл мэндийн салбар уг хэмнэлтийн горимд хамрагдахгүй бөгөөд цэцэрлэг, сургуулийн хүүхдийн эрт илрүүлэг, вакцинжуулалт, томуу, томуу төст өвчний эсрэг арга хэмжээ зэрэг зайлшгүй шаардлагатай ажлууд төлөвлөгөөний дагуу үргэлжилнэ гэж Ерөнхий сайд Н.Учрал онцоллоо.
Мөн бүх шатны төсвийн ерөнхийлөн захирагч нарт салбар бүрдээ урсгал зардлыг 20 хувиар бууруулах, нөхөн томилгоо хийхгүй байх, аялал, амралт, зугаалга, хамт олны урлаг, спортын арга хэмжээг зохион байгуулахгүй байх, төрийн албанд шинэ орон тоо бий болгохгүй байх, эрчим хүчний хэрэглээг хэмнэх, хурал, сургалтыг цахим хэлбэрт шилжүүлэх, төрийн албан хаагчдыг зарим өдрүүдэд цахимаар ажиллуулах арга хэмжээг үргэлжлүүлэхийг үүрэг болголоо.
Төсвийн сахилга бат сайжирч, эдийн засгийн нөхцөл байдал хэвийн болсон тохиолдолд эдгээр хязгаарлалтыг үе шаттайгаар сулруулах юм.
-
Шударга мэдээ2021/02/05
БНСУ руу нэмэлт нислэг үйлдэхээр боллоо
-
Цаг үе2021/02/26
Өмнөговьчууд 90 мянган мод тарина
-
Цаг үе2023/10/30
Монгол, Мексикийн боловсролын салбарт хамтын ажиллагааг өргөжүүлэх асуудлаар сан...
-
Цаг үе2022/05/19
Шинэ Нисэх буудлын хилийн хяналт, гаалийн ажилтан албан хаагчдын тоог нэмэгдүүлн...