Цаг үе
Монгол-Камбожийн бизнес эрхлэгчдийн уулзалт боллоо
Монгол-Камбожийн бизнес эрхлэгчдийн хамтарсан уулзалт анх удаагаа боллоо. Тус арга хэмжээг МҮХАҮТ-ын Ерөнхий нарийн бичгийн дарга С.Баясгалан, Германы олон улсын хамтын ажиллагааны нийгэмлэгийн хөтөлбөрийн захирал Др.Штефан Ханселманн нар нээж, үг хэллээ.
Хоёр улсын эдийн засгийн харилцааг тэлэх, худалдааг нэмэгдүүлэх, бизнес эрхлэгчид харилцан түншлэх, танилцах энэхүү уулзалтад Монгол Улсаас 20 гаруй, Камбож улсаас 14 аж ахуйн нэгж оролцож, өөрсдийн бараа,бүтээгдэхүүн, үйл ажиллагаагаа танилцуулав. Тухайлбал, жимс жимсгэнэ, мах, махан бүтээгдэхүүн, хүнс, аялал жуулчлал, арьс, ширэн бүтээгдэхүүн эрхлэх аж ахуйн нэгжийн төлөөллүүд оролцсон юм.
МҮХАҮТ-ын Ерөнхий нарийн бичгийн дарга С.Баясгалан Монгол-Камбожийн бизнес эрхлэгчдийн уулзалтыг нээж хэлсэн үгэндээ, Цар тахлын нөлөөтэйгээр уламжлалт худалдаа, бизнесийн гадаад харилцаа, хамтын ажиллагаанд ихээхэн өөрчлөлт гарч байгааг дурдаад, манай улсын хувьд хүнсний хэрэгцээнийхээ дийлэнх хэсгийг өмнөд хөршөөс хангаж ирсэн бол цар тахал, тээврийн хүндрэл, хил гаалийн нөхцөл байдлаас болж аж ахуйн нэгжүүд гуравдагч зах зээлийг эрэлхийлж эхэлснийг энэ үеэр хэллээ. Нэн ялангуяа, хүнсний бүтээгдэхүүн, жимс жимсгэнэ, хөдөө аж ахуйн бараа бүтээгдэхүүн, цагаан будаа гэх мэтчилэн Зүүн өмнөд Азийн шинэ зах зээлээс импортын бараа бүтээгдэхүүнийг оруулж ирэх хандлага сүүлийн саруудад нэлээд нэмэгдэж буйг тэмдэглэсэн юм. Энэ удаагийн уулзалт нь оролцогч талуудад харилцан үр ашигтай бизнесийн боломжуудыг нээхээс гадна бизнесийн арга туршлагаа хуваалцах, хүнсний үйлдвэрлэлд дэвшилтэт техник технологийг нэвтрүүлэх, хамтарсан үйлдвэр байгуулах, энэ чиглэлд хөрөнгө оруулалт татах, уул уурхайн бус экспортыг нэмэгдүүлэхэд бодитой түлхэц болно гэв. Монгол Улс өөрийн гэсэн онцлог, давуу талыг шингээсэн хөдөө аж ахуйн гаралтай бараа бүтээгдэхүүн, арьс шир, ноос ноолуур, мах, махан бүтээгдэхүүн гээд Зүүн өмнөд Азийн зах зээлд өрсөлдөх чадвартай бараа, бүтээгдэхүүн цөөнгүй байгааг МҮХАҮТ-ын Ерөнхий нарийн бичгийн дарга С.Баясгалан онцлоод бизнес эрхлэгчид хоорондоо мэдээлэл солилцох нь чухал, үр дүнтэй хэмээн уулзалтад амжилт хүслээ.
Монгол-Камбожийн бизнес эрхлэгчдийн уулзалтыг хамтарч зохион байгуулсан Германы олон улсын хамтын ажиллагааны нийгэмлэгийн хөтөлбөрийн захирал Др.Штефан Ханселманн Камбожийн бүтээгдэхүүн хөрш зэргэлдээ Вьетнамд чанартай гэдгээрээ ихээхэн алдартай. Тэр тусмаа хатаасан жимс жимсгэний хувьд Зүүн Өмнөд Азийн зах зээлд өрсөлдөхүйц. Энэхүү уулзалт, түншлэл нь Монголын зах зээлд нэвтрэх боломжийг олгох, бизнес эрхлэгчдийг холбоход гүүр болно гэдгийг онцоллоо гэж МҮХАҮТ-аас мэдээллээ.
Цаг үе
COP17-ын зочид, төлөөлөгчдөд үйлчлэх 250 орчим жолоочийг сургалтад хамруулжээ
Цөлжилттэй тэмцэх тухай НҮБ-ын конвенцын Талуудын 17 дугаар бага хурал (COP17)-ын зочид, төлөөлөгчдийн тээврийн үйлчилгээнд ажиллах жолооч нарт зориулсан нэгдсэн сургалтыг Зам, тээврийн яамны “Хөсөг” танхимд зохион байгууллаа.
Сургалтад COP17-ын үеэр автотээврийн үйлчилгээнд ажиллах төрийн болон хувийн хэвшлийн байгууллагууд, “Зорчигч тээвэр I, II”, “Зорчигч тээвэр III, IV”-ийн нийт 250 орчим жолооч, тээврийн хэрэгслийн зохион байгуулалт хариуцан ажиллах албан хаагчид хамрагдаж байна.
Монгол Улсад зохион байгуулагдах олон улсын хэмжээний энэхүү арга хэмжээний үеэр гадаадын зочид, төлөөлөгчдөд аюулгүй, шуурхай, соёлтой, мэргэжлийн түвшинд тээврийн үйлчилгээ үзүүлэх бэлтгэлийг хангах нь сургалтын гол зорилго юм.
Сургалтаар COP17-ын ерөнхий ойлголт, ач холбогдол, зохион байгуулалтын онцлог, зочид, төлөөлөгчдийн ангилал, үйлчилгээний стандарт, жолооч нарын үүрэг хариуцлага, сахилга бат, үйлчилгээний соёл, ёс зүй, мэргэжлийн харилцааны талаар нэгдсэн мэдээлэл өгчээ.
Түүнчлэн зочдыг нисэх буудлаас угтан авах, зочид буудал болон арга хэмжээний байршилд хүргэх үе шат, маршрут, хөдөлгөөний зохион байгуулалт, цагийн менежмент, мэдээлэл дамжуулах журам, холбогдох байгууллагуудын уялдаа холбоо, аюулгүй ажиллагааны чиглэлээр жолооч нарыг сургалт, арга зүйгээр хангаж байна.
Мөн зам тээврийн осол, саатал болон бусад эрсдэл, онцгой нөхцөл үүссэн үед авах арга хэмжээ, ачаалал ихтэй нөхцөлд тайван, зөв, шуурхай шийдвэр гаргах, өдөр тутмын ажлын бэлэн байдлыг хангах зэрэг практик ур чадварыг сургалтын хөтөлбөрт тусгажээ.
Сургалтыг танилцуулах лекц, асуулт-хариулт, жишээнд суурилсан сургалт, багаар ажиллах дасгал, маршрут болон тээвэрлэлтийн урсгалын зураглалтай танилцах, онцгой нөхцөлд ажиллах дадлага зэрэг онол, практик хосолсон хэлбэрээр зохион байгуулж байна.
Сургалтын үеэр COP17 олон улсын бага хурлыг зохион байгуулах Үндэсний хорооны Ажлын алба, Нийслэлийн тээврийн газар, Автотээврийн үндэсний төв болон Тээврийн цагдаагийн албаны холбогдох албан хаагчид чиг үүргийнхээ хүрээнд мэдээлэл өгч, мэргэжил, арга зүйн зөвлөмж хүргэлээ.
Тухайлбал, Тээврийн цагдаагийн албаны Зам тээврийн хяналт, төлөвлөлт, зохион байгуулалтын хэлтсийн ахлах мэргэжилтэн, цагдаагийн дэд хурандаа Т.Ганзориг замын хөдөлгөөний зохион байгуулалт, аюулгүй ажиллагаа болон олон улсын арга хэмжээний үеэр жолооч нарын анхаарах асуудлын талаар мэдээлэл өгсөн байна.
Уг сургалт нь COP17-ын үеэр зочид, төлөөлөгчдийн тээврийн үйлчилгээг аюулгүй, шуурхай, зохион байгуулалттай явуулах, үйлчилгээний нэгдсэн стандарт, сахилга хариуцлагыг хэвшүүлэх бэлтгэл ажлын нэг хэсэг гэж Зам, тээврийн яамнаас мэдээллээ.
Цаг үе
Улаанбаатарт хоногт 250 м³ лаг боловсруулах үйлдвэр байгуулна
Инженерийн дэд бүтцийг сайжруулах ажлын хүрээнд “Лаг хатаах, шатаах үйлдвэр”-ийг Улаанбаатар хотын Төв цэвэрлэх байгууламжийн урд хэсэгт, нийт 40 мянган ам метр талбайд 2025-2027 онд байгуулахаар төлөвлөжээ.
Одоогийн байдлаар Төв цэвэрлэх байгууламжаас хоногт дунджаар 238 тонн лаг гардаг бөгөөд хуримтлагдсан лагийн хэмжээ 843,200 м³-д хүрсэн байна.
Шинээр барих үйлдвэр хоногт 250 м³ лаг боловсруулах хүчин чадалтай. Боловсруулалтын дараа лагийн хэмжээг 5-6 м³ үнс болгон бууруулахаар тооцжээ.
Төслийн техник, эдийн засгийн үндэслэлийг боловсруулж дууссан бөгөөд Барилга хөгжлийн төвийн 2025 оны долоодугаар сарын 22-ны өдрийн магадлалын ерөнхий дүгнэлтээр баталгаажуулсан байна.
Мөн Нийслэлийн иргэдийн Төлөөлөгчдийн Хурлын 2025 оны 25/01 дүгээр тогтоолоор баталсан “Төр, хувийн хэвшлийн түншлэлээр нийслэлд хэрэгжүүлэх төслийн жагсаалт”-д лаг хатааж, шатаах үйлдвэр барих төслийг төр, хувийн хэвшлийн түншлэлийн хэлбэрээр хэрэгжүүлэхээр тусгажээ.
Лаг хатаах, шатаах технологи нь бохир ус цэвэрлэх байгууламжаас гардаг лагийг байгаль орчинд аюулгүй аргаар боловсруулж, эзлэхүүнийг эрс бууруулах зориулалттай. Лагийг өндөр температурт шатааснаар эзлэхүүн нь 90 хүртэл хувиар буурч, бактери, вирус болон бусад өвчин үүсгэгч бичил биетнийг устгах боломжтой.
Түүнчлэн шаталтын явцад үүсэх дулааныг цахилгаан болон дулааны эрчим хүч үйлдвэрлэхэд ашиглаж болдог. Зарим технологийн хувьд шаталтын дараа үлдэх үнснээс фосфор зэрэг ашигт эрдсийг сэргээн авах боломжтой аж.
Япон, Герман, Швейцар, Нидерланд, Өмнөд Солонгос зэрэг улс лаг хатаах, шатаах технологийг ашиглаж байна. Тухайлбал, Германд лаг шатаах үйлдвэрээс гарсан үнснээс фосфор сэргээн авах технологи ашигладаг бол Нидерландад төвлөрсөн лаг боловсруулах үйлдвэрүүдээр дулаан, цахилгаан эрчим хүч үйлдвэрлэдэг.
Ийнхүү лаг хатаах, шатаах технологийг лагийн эзлэхүүнийг бууруулахын зэрэгцээ эрчим хүч үйлдвэрлэх, нөөцийг дахин ашиглах чиглэлээр олон улсад өргөн ашиглаж байна.
Цаг үе
Нийтийн тээврийн Ч:19А чиглэлийн замналд түр хугацаагаар өөрчлөлт орууллаа
Баянзүрх дүүргийн Монелийн гудамжийн авто замын хэсэгчилсэн засвар, шинэчлэлтийн ажилтай холбоотойгоор тухайн хэсгийн авто замын хөдөлгөөнийг 2026 оны 08 дугаар сарын 7-ны 23:00 цагаас 2026 оны 08 дугаар сарын 10-ны 06:00 цаг хүртэл хаана.
Энэ авто замаар дайран өнгөрдөг нийтийн тээврийн Ч:19А “Цагаан давааны задгай-Сансарын үйлчилгээний төв” чиглэлийн замналд түр хугацаагаар өөрчлөлт орж байна.
Авто замын засварын хугацаанд тус чиглэл дараах зураглалын дагуу үйлчилгээ үзүүлэх тул иргэд та бүхэн зорчилтоо төлөвлөнө үү гэж Нийтийн тээврийн бодлогын газраас мэдээллээ.
