Цаг үе
Оюу Толгой төслийн Далд Уурхайн Барилга угсралтын компанийн ажилтнууд ажил хаялт зарлахаа мэдэгдлээ
Монгол Улс дахь Рио Тинто компанийн Оюу Толгой төслийн Далд Уурхайн Барилга угсралтын Уорли Инженеринг компанийн Мега төслийн хэмжээнд ажил хаялт хаялт зарлахаа тус компанийн ҮЭ-ийн хорооны зүгээс мэдэгдлээ.
Хэвлэлийн бага хурлын эхэнд Монголын Эрчим хүч Геологи Уул Уурхайн ҮЭ-ийн холбооны дарга Д.Долгор 2022 оны нэгдүгээр сарын 1-нээс эхлэн хэрэгжиж байгаа Хөдөлмөрийн тухай хуулийн шинэчилсэн найруулгын хэрэгжилтийг хангуулах, түүнийг дагаж гарах дүрэм журам, цалин хөлс тогтоох аргачлалд санал өгч холбогдох газруудад хандаж ажилласан талаар онцолж, уурхайчдын илүү цагийн хөлсийг олгох хүртэлх арга хэмжээг МЭХГУУҮЭ-ийн холбооны зүгээс авч ажиллахаа мэдэгдлээ.
Уорли Инженеринг гадаадын хөрөнгө оруулалттай компани нь 2016 оноос хойш Рио Тинто компанын Оюу Толгой төслийн Далд Уурхайн барилга байгууламжийн өргөтгөлийн ажлын бүтээн байгуулалтын ажлыг хариуцан ажиллаж байна. Одоогийн байдлаар 290 Монгол ажилчидтай үүнээс 215 Монгол ажилчид нь байдаг. Үйлдвэрчний Эвлэлийн Хорооны зүгээс ажилчдынхаа зөрчигдөж буй хөдөлмөрлөх эрх ашгийг хамгаалуулахаар МЭХГУУ Үйлдвэрчний Эвлэлийн Холбоонд хандаж МХЕГ-т гомдол гаргаж хяналт шалгалтын дагуу зөрчил арилгуулах албан шаардлагыг 2022 тавдугаар сарын 31-д хүргүүлсэн боловч ажил олгогч Уорли Инженеринг уг шийдвэрийг хүлээн зөвшөөрөөгүй төдийгүй Нийслэлийн Захиргааны хэргийн Анхан шатны шүүхэд гомдол гаргаж давж заалдах шатны шүүхээр ч ажил олгогч хууль зөрчсөн нь нотлогджээ.
Энэ тухай ҮЭ-ийн хорооны дарга Д.Жавхлантөгс “Уорли Инженеринг компани Монгол Улсын нутаг дэвсгэр дээр үйл ажиллагаа явуулахдаа Монгол Улсын хуулийг үл хэрэгжүүлэн хууль зөрчиж байгаа нь шүүхээр нотлогдсоор байхад хууль зөрчсөн үйлдэлээ залруулах арга хэмжээ авахгүй Монгол ажилчдын эрх ашгийг хохироосоор байна. Уорли Инженеринг Ажилчдын Үйлдвэрчний Эвлэлийн хорооны зүгээс Хамтын гэрээг шинэчлэн байгуулах, нэмэлт өөрчлөлт оруулах хэлэлцээрийг эхлүүлж хоёр талаас нийт гурван удаа уулзалт зохион байгуулж ажилчдынхаа цалин хөлсний тооцооллыг зөв тооцож олгуулах хэлэлцээрийг эхлүүлсэн боловч ажилчдынхаа цалин хөлсийг зөв тооцож олгох асуудал дээр хичээл зүтгэл, хүчин чармайлт гаргасангүйгээр үл барам дордуулсан нөхцөлтэй цалин бодолтын саналын тооцооллыг ирүүлснээр хоёр тал харилцан тохиролцоонд хүрсэнгүй.
Иймд Уорли Инженеринг Ажилтны Үйлдвэрчний Эвлэлийн хороо Хөдөлмөрийн тухай хуулийн 25.1.4 дүгээр заалтыг үндэслэн “Эвлэрүүлэн Зуучлалын ажиллагааны шатанд Хөдөлмөрийн маргааныг шийдвэрлэж чадаагүй” уг хуулийн 26 дугаар зүйлийн 26.1-т заалтад заасан арга хэмжээг хэрэгжүүлэн мөн хуулийн 26 дугаар зүйлийн 26.4-т заасны дагуу Ажил олгогч Уорли Инженеринг ГХО компанид ажил хаялт хийх мэдэгдлийг хуулийн хугацаанд албан тоотоор хүргүүлэх болно.
Уг үйл ажиллагаатай холбоотойгоор Монгол Улс дахь Рио Тинто компанийн Оюу Толгой төслийн Уурхайн талбар дахь Далд Уурхайн Барилга угсралтын Мега төслийн хэмжээнд ажилтнууд ажил хаялт зарлах болно. Үүнээс гарах үр дагаврыг Уорли Инженеринг ГХО компани хариуцах болохыг хариуцлагатайгаар мэдэгдэж байна” хэмээн хэллээ.
Эх сурвалж: МҮЭ
Цаг үе
Ерөнхий сайд Япон улсад ажиллаж, амьдарч буй иргэдтэйгээ уулзлаа
Монгол Улсын Ерөнхий сайд Н.Учрал Япон Улс дахь албан ёсны айлчлалынхаа үеэр /2026.09.30/ тус улсад ажиллаж, амьдарч буй монгол иргэдтэйгээ уулзаж, Засгийн газрын бодлогоо танилцуулав.
Ерөнхий сайд Н.Учрал энэ удаагийн айлчлал нь Засгийн газрын тэргүүний түвшинд найман жилийн дараа болж байна. Олон жил дуусдаггүй яриаг дуусгаж, “Чингис хаан” олон улсын нисэх буудлын өргөтгөлийн санхүүжилтийг шийдвэрлэлээ. Аялал жуулчлал, тээвэр логистик зэрэг олон салбарт эерэг нөлөө гарна. Хоёр орны харилцааны хамгийн том баялаг бол хүн. Тиймээс Япон загварын “Инженер, технологийн дээд боловсрол (MJEED)” буюу “1000 инженер” төслийн дараагийн үе шатыг хэрэгжүүлэх эрмэлзлээ илэрхийллээ.
Нийгмийн хамгааллын хэлэлцээрийг олон жил ярьсан, хэлэлцээг энэ онд багтаан эхлүүлнэ. Мөн Давхар татварын хэлэлцээрийг 2026 онд эхлүүлэхээр тохиролцлоо. Хөрөнгө оруулагчдад тогтвортой орчин чухал. 2016 онд хүчин төгөлдөр болсон Эдийн засгийн түншлэлийн тухай хэлэлцээрийн үр өгөөжийг нэмэгдүүлэхийн тулд шинэчилнэ. Засгийн газрын “Дөрвөн Чөлөөлөлт”-ийн бодлого хөрөнгө оруулагч, бизнес эрхлэгчдэд эрх зүйн таатай орчин бүрдүүлэхэд ач холбогдол өгч байгааг хэлэв. Тухайлбал, 280 зөвшөөрлийг цахимаар олгож байна. УИХ-аар Эдийн засгийн эрх чөлөөний тухай хуулийг батлуулсан. Гадаадын банк байгуулах эрх зүйн орчин нээлттэй болсон. БНСУ-ын хоёр банк, Унгарын нэг банк сонирхлоо илэрхийлсэн.
Төрийн өмчит компанийн засаглалыг сайжруулж, хөрөнгө оруулалтын шинэ бат бөх суурь бий болгох хүрээнд хөрөнгийн удирдлагын чиглэлээр салбартаа тэргүүлэгч BlackRock компанитай гэрээ байгуулж ажиллаж байна. Төрийн өмчит компаниуд IPO гаргаж, менежментийг олон улсын компани удирдах тогтолцоонд шилжинэ. Ирэх онд 1072 хувьцааг Хөрөнгийн биржид бүртгэснээр иргэн бүрийн эзэмшиж буй хувьцааны үнэлгээ өснө гэж үзэж байна.
Уулзалтын үеэр Японд ажиллаж, амьдарч буй манай иргэдийн санал бодлоо хэлж, Ерөнхий сайд асуултад нь хариулав. Япон Улсад 21 мянга гаруй монгол иргэн байнга оршин сууж байна.
Цаг үе
Жетро монголд салбараа нээнэ
Монгол Улсын Ерөнхий сайд Н.Учралд Японы Гадаад худалдааг дэмжих байгууллага (ЖЕТРО)-ын Ерөнхийлөгч Н.Ишигүро /2026.09.30/ бараалхав.
Уулзалтын үеэр Монгол, Японы худалдаа, эдийн засаг, бизнес, хөрөнгө оруулалтын хамтын ажиллагааг өргөжүүлэх, 2016 онд хүчин төгөлдөр болсон Эдийн засгийн түншлэлийн тухай хэлэлцээрийн үр өгөөжийг нэмэгдүүлэх талаар санал солилцов.
Ерөнхий сайд Н.Учрал Монгол Улсын Засгийн газар хувийн хэвшлийг дэмжих, бизнес, хөрөнгө оруулалтын орчныг сайжруулах, зөвшөөрлийн шат дамжлагыг бууруулах, хөрөнгө оруулагчдын эрх, хууль ёсны ашиг сонирхлыг хамгаалсан тогтвортой, өрсөлдөх чадвартай орчныг бүрдүүлэхэд тусгайлан анхаарал хандуулж буй талаар мэдээлэв.
Монгол Улсад ЖЕТРО Төлөөлөгчийн газраа байгуулах тухай манай саналыг Японы тал дэмжиж буйд талархал илэрхийлж, манай улсаас Японд нийлүүлэх экспортын бараа, бүтээгдэхүүний нэр төрөл, хэмжээг нэмэгдүүлэх шаардлагатайг тэмдэглэсэн. Мөн Эдийн засгийн түншлэлийн тухай хэлэлцээрийн хэрэгжилтийг хангах, үр ашгийг дээшлүүлэх чиглэлээр ЖЕТРО-той хамтран ажиллахаа илэрхийлэв.
ЖЕТРО олон улсын худалдааны өндөр мэдлэгтэй мэргэжилтнийг түнш орондоо илгээж, тухайн орноос Японы зах зээлд худалдаалах бараа, бүтээгдэхүүнийг судалж, үйлдвэрлэлт, борлуулалтын “ноу-хау”, инновацыг нутагшуулах, маркетингийн зөвлөгөө өгөх зэрэг үйл ажиллагаа хэрэгжүүлдэг. Энэ нь хөгжиж буй улс орнуудын хувьд технологи, инновацын хөгжлийг дэмжих чухал ач холбогдолтой юм.
ЖЕТРО 1958 онд Япон Улсын Олон улсын худалдаа, үйлдвэрийн яамны дэргэд гадаад орнуудтай хийж буй худалдаанд дэмжлэг үзүүлэх зорилготой байгуулагдсан. Японы бараа бүтээгдэхүүнийг гадаад улс орнуудад таниулан сурталчлах, Японы хэрэглэгчдэд шаардлагатай импортын бараа бүтээгдэхүүнийг судлах, үзэсгэлэн яармаг зохион байгуулж, сурталчлах, бизнесийн төлөөлөгчдийг хүлээн авах зэрэг үйл ажиллагааг явуулдаг байна.
Цаг үе
Монголбанкны хуримтлагдсан алдагдал 7.5 их наяд төгрөгт хүрчээ
Үнэ тогтворжуулах бодлого, ипотекийн зээл зэрэгтэй холбоотойгоор Монголбанкны хуримтлагдсан алдагдал 7.5 их наяд төгрөгт хүрсэн талаар тус банкны Ерөнхийлөгч С.Наранцогт УИХ-ын Эдийн засгийн байнгын хорооны дарга, гишүүдтэй уулзах үеэр мэдээллээ.
Эдийн засгийн байнгын хорооны дарга Б.Заяабал, УИХ-ын гишүүн Б.Мөнхсоёл, Г.Лувсанжамц, Ж.Золжаргал, О.Батнайрамдал, Р.Батболд нар 2026 оны есдүгээр сарын 29-нд Монголбанканд ажиллаж, төв банкны үйл ажиллагаатай танилцсан байна.
Уулзалтын үеэр С.Наранцогт “Төрөөс мөнгөний бодлогын талаар 2027 онд баримтлах үндсэн чиглэлийн төсөл”-ийг танилцуулж, гишүүдтэй санал солилцов. Тэрбээр төслийг сүүлийн 15 жилийн сургамжид үндэслэн, тухайн жилийн онцлогт нийцүүлж, хэмжигдэхүйц, үр дүнд суурилсан байдлаар боловсруулсныг онцолжээ. Хуульд заасан хугацаанд УИХ-д өргөн мэдүүлэх уг төслийг олон нийтээр хэлэлцүүлж, санал авсан байна.
Мөн тогтолцооны суурь шинэчлэл хийх шаардлагатайг дурдаж, төв банкны эрх зүйн орчныг боловсронгуй болгоход парламентын дэмжлэг хэрэгтэй байгааг илэрхийлэв. Монголбанк анх удаа дунд хугацааны стратеги баталж, үнийн болон санхүүгийн тогтвортой байдлыг хангах, төв банкны засаглалыг сайжруулах, цахим шилжилтийг эрчимжүүлэхээр зорьж буйг танилцуулжээ.
Байнгын хорооны дарга Б.Заяабал Валютын зохицуулалтын тухай хууль болон уулзалтаар хөндсөн, хэрэгжилт хангалтгүй эрх зүйн зохицуулалтад дүн шинжилгээ хийж, шаардлагатай тохиолдолд ажлын хэсэг байгуулах асуудлыг хөндөв.
Гишүүдийн зүгээс ипотекийн зээлийн хөтөлбөрийн харьяалал, ногоон зээл, төв банкны санхүүгийн нөхцөл байдлын талаар асуулт асууж, байр сууриа илэрхийллээ. Тухайлбал, Б.Мөнхсоёл ипотекийн зээлийн хөтөлбөрийг өөр байгууллагад шилжүүлэх асуудал олон жил яригдсан ч шийдэгдээгүйг дурдсан бол Г.Лувсанжамц үр дүнд суурилсан төсөл боловсруулсныг сайшааж, ногоон зээлд цахилгаан автомашин хамруулах нь зохистой эсэхийг тодруулав.
О.Батнайрамдал Оюутолгойн асуудлаар Монголбанканд өгсөн чиглэлийг хэрэгжүүлэхийг сануулж, Ж.Золжаргал эдийн засгийн асуудлыг шийдвэрлэхэд улс төрийн шийдэл шаардлагатай болсон талаар байр сууриа илэрхийллээ.
